Hugenote Vereniging van Suid-Afrika

Doelwitte van die Hugenote-Vereniging van Suid-Afrika:

Die Hugenote-Vereniging van Suid-Afrika is op 12 Maart 1953 gestig, en beywer hom vir die bewaring en uitbouing van die Hugenote erfenis deur:

die Hugenote Monument en Museum te Franschhoek in stand te hou;
die besef van die betekenis van die Hugenote se vestiging in Suid-Afrika lewend te hou;
die navorsing van ons Hugenote-verlede veral ten opsigte van geskiedenis en ondersteuning van genealogiese navorsing;
die publikasie van genealogieë van Suid-Afrikaanse families van Hugenote-afkoms te onderneem;
die aanmoediging van die bewaring, bekendstelling en finansiering van Hugenote-erfstukke in die Hugenote Gedenkmuseum in Franschhoek; en
die organisering van herdenkingsbyeenkomste.
verbinding te soek met Hugenote-verenigings in die buiteland.

Gedenk-posseëls vir die 250ste herdenking van die koms van die Hugenote na die Kaap van Goeie Hoop,
uitgegee op 17 Julie 1939

Hugenote gedenk-posseëls en -stempel vir die 300ste herdenking van die koms van die Hugenote na die
Kaap van Goeie Hoop, uitgegee op 13 April 1988

Gereelde Aktiwiteite

Sedert 1953 publiseer die Hugenote-Vereniging van SA elke jaar in September 'n Hugenote Bulletin waarin lede se navorsing en veral genealogiese artikels vervat is. Die redaktrise is Mev Biebie van der Merwe. Sien hieronder vir 'n kompakskyf wat alle uitgawes van die Hugenote-Bulletin van 1963 - 2004 bevat.
Tydens Hervormingsfees (die laaste week van Oktober) vind die Algemene Jaarlikse Vergadering van lede in Franschhoek plaas, as deel van die Hugenotefees wat in Franschhoek gehou word.

Lidmaatskap van die Vereniging is oop vir almal wat hulle met die doelstellings van die vereniging vereenselwig en voldoen aan die vereistes van die grondwet van die Vereniging. Lidmaatskapgelde is soos volg:

Gewone lid (binnelands in SA): R50 p.j.
Lewenslid (binnelands in SA): R300 eenmalig
Egpaarlid (binnelands in SA): R400 eenmalig
Buitelandse lid: VSA $30 p.j. of $150 eenmalig (lewenslid)

U kan 'n aansoekvorm vir lidmaatskap van die Hugenotevereniging van SA aflaai deur hier te klik. 'n Pamflet oor die werksaamhede van die Vereniging (en aansoekvorm) kan afgelaai word deur hier te klik..
'

Hugenote-bulletin Argief 1963—2004

Die Bulletin van die Hugenote Vereniging van SA word jaarliks uitgegee en bevat artikels wat fokus op die geskiedenis, erfenis en genealogie van die Hugenote, en bepaald die Hugenote wat hulle in Suid-Afrika gevestig het. Artikels oor die familiegeskiedenis en genealogie van Hugenote-vanne verskyn daarin.

Sedert 1994 fokus die Bulletin telkens in agtereenvolgende jare op een of ander Hugenote-familie. Die volgende vanne is reeds behandel: Marais (1994), Cilliers (1995), Viljoen (1996), Joubert (1997), Malherbe (1998), Cronjé (1999), Retief (2001), Fourie (2003), Buys (2004), Rossouw/Rousseau (2005), Mouton (2006), Fouché (2007), Nel (2008), Vivier (2009), Du Plessis (2010) en Bruwer (2011). Die 2002 uitgawe is gewy aan referate wat tydens die 3de Internasionale Hugenote-konferensie wat in Stellenbosch en Franschhoek gehou is, gelewer is. Ander Hugenote-vanne wat dikwels figureer is Jordaan, Malan, De Villiers en Naudé.

‘n Kompakskyf wat alle uitgawes bevat van die Bulletin sedert die eerste uitgawe van 1963, tot en met 2004, is nou beskikbaar.

Die KS is beskikbaar teen 'n koste van R120.00 ($20.00) + posgeld (binne Suid-Afrika, R20.00 - alle ander plekke $7.00). Kontak die Hugenote-Vereniging van SA vir besonderhede van betaling.

Familie De Villiers Genealogie op KS

Die Familie De Villiers Genealogie volumes 1 en 2 is oorspronklik in 1997 gepubliseer, en is gebaseer op navorsing wat uitgevoer is deur die baanbreker genealoog Christoffel C de Villiers, en voortgesit deur die legendariese prof Con de Villiers. Laasgenoemde het sy navorsing aan die Hugenote Gedenkmuseum in Franschhoek nagelaat, waar die monumentale werk deur Juna Malherbe en Alet Malan voltooi is. Die oorspronklike oplaag is spoedig uitverkoop, maar is nou op kompakskyf (KS) beskikbaar en bevat meer as 20 000 De Villiers familiename en meer as 10 000 eggenotes. Die KS is in Folioviews formaat wat 'n kragtige soekenjin insluit om soektogte na bepaalde indiwidûe te vergemaklik.

Die KS is beskikbaar teen 'n koste van R250.00 ($42.00) + posgeld en verpakking (binne Suid-Afrika, R20.00 - alle ander bestemmings $7.00). Kontak die Hugenote-Vereniging van SA vir besonderhede van betaling.

Hugenote Kantate Op 51 op kompakskyf

As deel van die vierings in 1988 van die 300ste herdenking van die aankoms van die Hugenote in Suid-Afrika, is die vermaarde komponis Hubert du Plessis deur die Hugenote-Vereniging van SA versoek om die Hugenote Kantate opus 51 te komponeer. Die librettis was Ode Krige.
Die kantate is drie keer uitgevoer in Johannesburg, Pretoria en Kaapstad deur die Kruik-orkes en Operakoor, en SAUK kamerkoor, met Virginia Oosthuizen (sopraan), Renée Rakin (alt), Sjoerd Beute (tenoor) en Peter Kramer (bas) as soliste. Die dirigent was Richard Cock.
’n Opname van die uitvoerings het behoue gebly en is tegnies verwerk om as kompakskyf beskikbaar te stel deur die Hugenote-Vereniging van SA.
Oor die kantate skryf die komponis Hubert du Plessis soos volg:

“Ek het aan myself die volgende eise gestel: geen resitatiefpassasies nie; die gebruik van 'n orkes met 'n oorwegende barok-klank (klarinette en horings is dus afwesig, en ook pouke - klokke was uiteraard noodsaaklik); soveel kontraste as moontlik; spesiale aandag aan die solo-alt.
“Benewens wou ek oorwegend eenvoud nastreef, die musiek verteenwoordigend van sowat tien eeue. Die invoeging van bestaande komposisies, ten volle of gedeeltelik, was vir my 'n vereiste terwille van hul simboliese trefkrag. Die keuse van 'n paslike Hugenote-psalm vir elk van die drie dele - Vervolging, Vlug, Vestiging - was uit die staanspoor vanselfsprekend.”

Die werk bestaan uit drie dele: Vervolging (26 min), Vlug (16 min) en Vestiging (19 min). Die kompakskyf bevat ’n pamflet met die volledige libretto sowel as ‘n verduideliking deur die komponis van die simboliek van talle aanhalings en teksverwysing. Vir Engelssprekendes is die libretto in Engels vertaal en word dit ingesluit in ’n spesiale uitgawe van die kompakskyf, ofskoon die uitvoering in Afrikaans geskied.
Die prys is R90 plus posgeld en verpakking (R20 binne die RSA, R30 buiteland) en bestellings kan geplaas word by die Hugenote-Vereniging van SA

Theron Geslagsregister

Theron Geslagsregister plus kompakskyf Die Theron Geslagsregister is saamgestel deur dr C.G. (Chris) Theron en verwerk vir publikasie deur Jeanette Theron en Andries Nieuwoudt, met 'n geskiedkundige agtergrond oor die Theron familie in Suid-Afrika geskryf deur dr J.N. (Hannes) Theron. Dit verskyn as publikasie no 2 in die Genealogiereeks van die Hugenote-Vereniging van Suid-Afrika.
Die publikasie bestaan uit twee volumes en 'n kompakskyf:
Vol 1 (372 bladsye) bevat 'n geskiedkundige oorsig, 'n bydrae oor die Theron familiewapen, fotos (sommige in kleur) van die Therons in Suid-Afrika, en 'n naamindeks van Therons en aangetroudes;
Vol 2 (505 bladsye) bevat die genealogie van die Therons in Suid-Afrika, soos oorspronklik saamgestel deur dr Chris Theron.
Die stel van twee boeke gaan saam met 'n kompakskyf wat die naamindeks van Therons en aangetroudes bevat (om elektroniese soektogte na die name te vergemaklik), al die fotos wat in vol 1 verskyn, en 'n insiggewende grafiese voorstelling van die eerste 5 geslagte van die Therons.

Die prys van die volledige stel (twee boeke plus kompakskyf) is R425 (plus R50 vir posgeld en verpakking, binnelands en R170 buitelands). Lewenslange lede van die Hugenote-Vereniging van SA kan die stel aankoop teen 'n prys van R300 (plus posgeld en verpakking, R50 binnelands en R170 buitelands); gewone lede van die Hugenote-Vereniging van SA kan die stel aankoop teen 'n prys van R380 (plus R50 vir posgeld en verpakking binnelands en R170 buitelands). Bestellings kan geplaas word by die Hugenote-Vereniging van SA waar besonderhede oor inbetalings in die bankrekening van die Hugenote-Vereniging beskikbaar is.

CILLIÉ: RHEBOKSKLOOF EN SY MENSE

Die familiekroniek Cillié: Rhebokskloof en sy mense verskyn as publikasie no 4 in die Genealogiereeks van die Hugenote-Vereniging van Suid-Afrika. Dit is die nuwe verbeterde en bygewerkte familiegeskiedenis van die Cillié-familie in Suid-Afrika deur dr Andrew Kok. Dit beslaan 360 bladsye en die geskiedenis en genealogie van elk van die tien kinders van Petrus Johannes Cillié van Rhebokskloof, Wellington, sowel as die nasate van Johannes Arnoldus Cillié van Pampoenkraal, Porterville, word behandel. Die publikasie word ryklik aangevul met biografiese besonderhede en fotos van ‘n groot aantal familielede.
Die boek gaan saam met ‘n kompakskyf wat die naamindeks van die register bevat,wat elektroniese soektogte na name sal vergemaklik, sowel as fotos van sowat 1000 individue wat in die register aangeteken is, sowel as fotos van vele Cillié reunies.
Die prys van die volledige stel (boek en kompakskyf) is R210 (plus R50 posgeld en verpakking binnelands en R170 buitelands). Lewenslange lede van die Hugenote-Verenging van SA kan die stel aankoop teen ‘n prys van R140 (plus R50 posgeld en verpakking binnelands en R170 buitelands); gewone lede lede van die Hugenote-Verenging van SA kan die stel aankoop teen ‘n prys van R180 (plus R50 posgeld en verpakking binnelands en R170 buitelands). Vir bestellings van tien of meer boeke is die prys R140 (plus posgeld).
Bestellings kan geplaas word by die Hugenote-Vereniging van SA waar besonderhede oor inbetalings in die bankrekening van die Hugenote-Vereniging verkry kan word.

Die Labuschagne Gedenkboek
Die Franse Voorouers van die Labuschagne Familie

Hierdie boek het tot stand gekom in verband met die jubileumviering in Paarl ter herdenking van die aankoms van Pierre Labuscaigne, die stamvader van alle Labuschagnes, op 14 Mei 1711 in die Kaap van Goeie Hoop. Dit is ’n beskrywing van hulle voorgeskiedenis en in dié opsig is dit ’n studie oor die tragiese lotgevalle van Hugenote-families. Die outeur, prof Casper Labuschagne, gee ’n insiggewende oorsig van die gewelddadige onderdrukking van andersdenkendes deur die Rooms–Katolieke Kerk in noue samewerking met die Franse staat, met as absolute laagtepunt die vervolging van die Hugenote. Daarby word ook gefokus op die wreedhede wat toegepas is om hulle hul geloof te laat afsweer, of as martelaars te sterf, of te vlug.
Hy doen tewens uitgebreid verslag van sy jarelange navorsing en soektog na die plekke waar die voorouers gewoon het en van die verrassende ontdekking van argiefstukke in Frankryk, Duitsland en Nederland. Op grond daarvan kon hy die geskiedenis van sy voorouers beskryf vanaf die begin van die 17de tot die aanvang van die 18de eeu.
Die prys van die boek is R150 (plus R30 posgeld en verpakking binnelands en R70 buitelands). Lewenslange lede van die Hugenote-Vereniging van SA kan die boek aankoop teen ‘n prys van R100 (plus R30 posgeld en verpakking binnelands en R70 buitelands); gewone lede lede van die Hugenote-Vereniging van SA kan die boek aankoop teen ‘n prys van R120 (plus R30 posgeld en verpakking binnelands en R70 buitelands). Vir bestellings van tien of meer boeke is die prys R100 (plus posgeld).
Bestellings kan geplaas word by die Hugenote-Vereniging van SA waar besonderhede oor inbetalings in die bankrekening van die Hugenote-Vereniging beskikbaar is.
Die boek is in Engels in e-boek formaat beskikbaar; vir besonderhede, klik hier.

Die Hugenote van Suid-Afrika 1688-1988

"Die Hugenote van Suid-Afrika 1688-1988" is geskryf deur prof Pieter Coertzen vir die 300-jarige herdenking van die aankoms van die Hugenote in Suid-Afrika. Dit word allerweë beskou as dié standaardwerk oor die geskiedenis van die Hugenote in Suid-Afrika.
Die boek beskryf die opkoms van die Gereformeerde Kerk in Frankryk tot die middel van die 16de eeu; die lewe van die Hugenote in Frankryk onder die kruis van vervolging; hul oortog en aankoms aan die Kaap van Goeie Hoop (met die grootskaalse immigrasie wat plaasgevind het in die jare 1688-1689); hul vestiging aan die Kaap van Goeie Hoop, en hul bydrae tot die ontwikkeling van Suid-Afrika.
Die boek is ryklik geïllustreer met argivale dokumente en afbeeldings, en bevat 'n volledige lys van alle Hugenote wat na die Kaap van Goeie Hoop geëmigreer het, hul plek van herkoms, die boot waarmee hul gereis het, die datum van aankoms, en die plek van vestiging aan die Kaap, en besonderhede van die gade(s).
Die boek beslaan 187 bladsye, is voorsien van 'n hardeband, en kos R140 plus R40 posgeld en verpakking (binnelands). Bestellings kan geplaas word by die Hugenote-Vereniging van SA waar besonderhede van buitelandse posgeld ook beskikbaar is. Die boek is ook beskikbaar in Engels; vir besonderhede, klik hier.

Volgende bladsy: Die Hugenotemonument:

Tuisblad.